Sólmar Marel fjölyrki er mikil áhugamanneskja um mannlífið, atvinnulífið, stöðu fjölyrkja (öryrkja) um tungumálið okkar og orðræðuna um stöðu minnihlutahópa í samfélaginu.
Umræðan um stöðu öryrkja (fjölyrkja) í samfélaginu er neikvæð, sérstaklega þegar horft er til lítillar atvinnuþátttöku þeirra á vinnumarkaði. Bæði vegna fordóma, fyrirkomulags bótagreiðslna og skorts á tækifærum á vinnumarkaði.
Sólmar Marel fjölyrki, ber nafn sem kyngreinir ekki persónuna þar sem bæði nöfnin eru gjaldgeng fyrir konur og karla. Samfélag sem mismunar einstaklingum eftir efnahag og þar sem fordómum er leyft að þrífast missir af hæfileikum og sköpunarkrafti þeirra sem búa við fötlun og skerðingar hverskonar.
Sólmar Marel fjölyrki, vinnur að því að brjóta upp þessa ímynd. Hann er hvetjandi og leiðandi í að skapa jákvæða umræðu og byggja upp nýja ímynd og sýn á getu, hæfileika og framlag fólks í þessari stöðu í samfélaginu.
Nauðsynlegt er að atvinnulífið og fjölyrkjar, snúi sér í sömu átt að þeim möguleikum sem felast í ólíkri lífsreynslu og bakgrunni, því hvert og eitt okkar skiptir máli, sem heild. Öll erum við einstök þó ólík séum.
Sólmar Marel byrjar hvern dag á eftirfarandi:. „Ég skipti máli þegar ég er einn af ykkur.
Sólmar Marel ákvað því að gefa út litla verkefnabók er fyrir þig til að skapa og búa til „ný störf “ og leika þér með ímyndunaraflið og fallegu starfsheitin okkar, þú manst við erum í þessu saman.
Ávinningur umræðu um getu og framlag fjölyrkja (öryrkja) til samfélagsins dregur úr fordómum og eflir sjálfstraust og sjálfsmynd fólks í þeirri stöðu.
Umræðan og aðgerðir geta klárlega verið atvinnurekendum hvatning til að virkja og nýta mannauð fjölyrkja (öryrkja) betur, þannig fellur hún afar vel að samfélagslegum ávinningi heildarinnar.
Við erum samfélag allra.